Call us now:
Samdi 12 Avril 2014, CSU (Creole Speaking Union) ti organiz premie dikte an Kreol ouver pou piblik dan Caudan. Konkour-la ti divize an trwa kategori : zelev primer, zelev segonder, ek kategori adilt. Ti ena omwin 150 partisipan . Bann partisipan finn sorti depi kat kwin Moris pou fer sa premie dikte an lang Kreol-la.
Lobzektif prinsipal sa dikte-la ti promosion lortograf ofisiel pou Kreol Morisien ti. Li ti enn fason fer dimounn kone ki ena enn lortograf standar ek ankouraz zot pou servi li. Bann zelev primer inn aprann ekrir kreol dan lekol ek lezot partisipan inn aprann ekrir kreol dan bann kour ek bann text ki finn pibliye.
Li ti interesan trouve ki parmi bann partisipan ti ousi enan bann dimounn ki pa 100% kreolofonn oubien ki pa bann kreolofonn natif. Bann text ki ti pou servi dan kad konkour finn res sele ziska sa zour-la, pou gard zot konfidansialite. Bann zanfan primer ek etidian segonder finn gagn enn text ki enn adaptasion « Conseil tenu par les rats »’ par Jean La Fontaine ki finn vinn « Zistwar sat ek lera » an Kreol.
Apre sa, ti ariv tour bann adilt pou fer dikte. Zot ti ena adaptasion « Le Corbeau et le Renard » ki finn vinn « Zistwar Korbo ek Zako » en Kreol. Nonb adilt ki ti inskrir pou konkour finn depas nonb ki komite organizater ti pe atann. Nivo dikte pou bann adilt ti biensir pli elve ki pou bann zelev lekol. Bokou finn res lontan an refleksion, sirtou avan ekrir bann long mo. Dan sertin ka, zot pa ti pe kone si se bann mo-konpoze ou pa, ek si se mo-konpose, kot bizin met tre-dinion. Enn mo ki finn fer plizir reflesi, se mo « detanzantan » ,parski dan franse « de temps en temps » ekrir an kat mo.
Alafin dikte, kan tou bann partisipan fini ekrir ek verifie si ena fot dan zot travay, finn ramas zot papie pou kapav fer koreksion plitar. CSU finn answit afis bann text-la lor enn noticeboard, ek bann partisipan finn kapav verifie dout ki zot ti ena par rapor a sertin mo. Gran, tipti ti vini par plezir me osi pou teste zot nivo pou ekrir Kreol Morisien dan lortograf ofisiel.
Lazourne finn fini avek enn santiman sispans. Bann partisipan ti bizin atann ankor enn de trwa zour avan ki anons nom bann gagnan pou diferan kategori.
